dikhlae khuda us sitam-ijad ki surat
istada hain hum bagh mein shamshad ki surat

yaad aati hai bulbul pe jo bedad ki surat
ro deta hun main dekh ke sayyaad ki surat

aazad tere ai gul-e-tar bagh-e-jahan mein
be-jah-o-hasham shad hain shamshad ki surat

jo gesu-e-jaanan mein phansa phir na chhuta wo
hain qaid mein phir khub hai miad ki surat

khinchenge mere aaina-rukhsar ki taswir
dekhe to koi mani-o-bahzad ki surat

gali ke siwa hath bhi chalta hai ab un ka
har roz nai hoti hai bedad ki surat

kis tarah 'amanat' na rahun gham se main dil-gir
aankhon mein phira karti hai ustad ki surat