dil-e-be-ikhtiyar ki khushbu
us par is intizar ki khushbu

is phate aasman ki bais hai
hum se sina-figar ki khushbu

itna be-sabr chaak sina hai
sungh leta hai tar ki khushbu

makhmali pairahan se aati hai
daman-e-tar-tar ki khushbu

kab tamam-umr sath rahti hai
zoam-e-na-paedar ki khushbu

bu-e-manzil mein ghul hi jaegi
ye mere pa-e-khar ki khushbu

kho gai daur-e-hijr mein 'nayab'
mere lail-o-nahaar ki khushbu