dil jahan bhi duba hai un ki yaad aai hai
hae kya sukun-parwar dard-e-ashnai hai

tum sarab ban ban kar apni chhab dikhate ho
tishna-lab musafir ki jaan par ban aai hai

ye kashakash-e-hasti kitni dur le aai
din kahan guzara hai shab kahan ganwai hai

zindagi teri khatir tere dard-mandon ne
ek jahan ki tohmat apne sar uthai hai

roz-o-shab meri khatir jis ka dil dhadakta tha
ab ye haal hai us ki yaad bhi parai hai

main sada-e-gum-gashta main ada-e-na-zeba
mera nam kitnon ko wajh-e-khud-numai hai

khwab ho chuke 'shahin' sare waqiye phir bhi
shahr shahr mein ab tak dastan-sarai hai