dil jo shaista-e-jafa na hua
lazzat-e-gham se aashna na hua

tu kabhi pas se juda na hua
dil magar surat-ashna na hua

zindagi ka maza wo kya jaane
jis ko marne ka hausla na hua

hum ko shikwa raha judai ka
aur tu pas se juda na hua

tum se kahne se faeda koi
khair jo kuchh hua bura na hua

sochte hi rahe kahin na kahin
na hua arz-e-muddaa na hua

yaad karte hain husn-o-ishq hamein
mar ke bhi khatm silsila na hua

dam-e-ulfat mein jo phansa 'nashad'
ho ke aazad bhi riha na hua