dil ka sukun dhundhne jae bashar kahan
aisa magar hai kaun sa aisa hai dar kahan

tum ne to kah diya ki chale jao bazm se
ye to bata do hum ko ki jaen kidhar kahan

us ki gali ko chhod ke aa to gae magar
ab sochte hain guzrenge sham-o-sahar kahan

baitho hamare pas karo hum se dil ki baat
har aadmi milega tumhein mo'atabar kahan

phaili hui hai dhup masaib ki dur tak
ab saya-dar rah mein meri shajar kahan

jab chaaragar hi koi nahin tere shahar mein
le kar main jaun apna ye zakhm-e-jigar kahan

kisi ki 'qamar' talash hai kisi ki hai aarzu
nikle ho itni raat mein tanha idhar kahan