dil ke safhon mein jal lafzon ka
jaan par hai wabaal lafzon ka

kaise mahfuz hon usul-e-huruf
badh raha hai zalal lafzon ka

uljhe rahte hain sab ibarat mein
hai ajab ye kamal lafzon ka

harf to harf kat gae nuqte
allah allah jalal lafzon ka

ab qayamat zaban pe aaegi
ho raha hai qital lafzon ka

hai kitabon mein dimakon ka hisar
aa gaya ab zawal lafzon ka

bich rahon mein saut ke hamrah
lut gaya sara mal lafzon ka

tum to sheron mein kho gae 'qudsi'
aur hum ko malal lafzon ka