dil ki khwahish hai ki main waqt ka nauha likkhun
zindagi kya hai faqat aag ka dariya likkhun

yahan saman-e-nashat-e-dil-o-jaan koi nahin
gham-e-dauran tera kaisa main sarapa likkhun

yahan guftar mein shirini hai kirdar mein khot
kya hai pasti ka sabab tu hi bata kya likkhun

zahr-alud hai manzar ki faza hai masmum
haal kaghaz pe main kis kis ki ata ka likkhun

roz ek aur tamasha nazar aata hai 'shabin'
roz ek aur badalta hua chehra likkhun