haqiqaton ka sabhi ko pata nahin hota
koi kisi se bichhad ke juda nahin hota

talluqat nibhana nahin bahut mushkil
har aadmi mein magar hausla nahin hota

sharab-khane ka har shakhs hai bura lekin
sharab-khane mein koi bura nahin hota

meri taraf se shikayat ka intizar na kar
mujhe kisi se bhi koi gila nahin hota

khula ye raaz kai bar mil ke 'shahid' se
bura jo hai wo hamesha bura nahin hota