dil ko mitne ka nishan rahta hai
aag bujhne pe dhuan rahta hai

han salamat raho rindo tum par
kuchh rifaqat ka guman rahta hai

sho'le yun uthte hain gulzaron se
ki bahaaran ka saman rahta hai

aashiqi muhr-ba-lab rahti hai
muddai mahw-e-bayan rahta hai

sab khudaon ki khudai ka shuur
dil-e-insan pe giran rahta hai

tujh pe makhfi hai jo mujh par guzri
tu qarib-e-rag-e-jaan rahta hai

tum kahan rahte ho 'abid' meri jaan
dil to rahta hai jahan rahta hai