dil ko rah rah ke ye andeshe darane lag jaen
wapsi mein use mumkin hai zamane lag jaen

so nahin paen to sone ki duaen mangen
nind aane lage to khud ko jagane lag jaen

us ko dhunden use ek baat batane ke liye
jab wo mil jae to wo baat chhupane lag jaen

har december isi wahshat mein guzara ki kahin
phir se aankhon mein tere khwab na aane lag jaen

itni takhir se mat mil ki hamein sabr aa jae
aur phir hum bhi nazar tujh se churane lag jaen

jit jaengi hawaen ye khabar hote hue
tez aandhi mein charaghon ko jalane lag jaen

tum mere shahr mein aae to mujhe aisa laga
jun tahi-damanon ke hath khazane lag jaen