dil le ke hamara phirta hai ye kaun watira tera hai
karta hai chhichhori baaten kyun har baat mein tera mera hai

tum chehra apna dikhla do kuchh rah-e-khalasi batla do
ek zulf ka sauda sar mein hai ek kali bala ne ghera hai

is aane ki kya mujh ko khushi pabandi is mein kahe ki
bhule se idhar bhi aa nikle ek jogi ka sa phera hai

hum aap hain ek bala-e-bad kya hum se karega koi kad
aghyar karen hum se kawish munh hum ko sara tera hai

hum jaan se apni jate hain par dil se ye jata hi nahin
is ishq ka howe bura 'anjum' kya is ne dala dera hai