dil le ke hasinon ne ye dastur nikala
dil jis ka liya us ko bahut dur nikala

zahid ko kisi aur ki baaten nahin aatin
aaya to wahi tazkira-e-hur nikala

dushman ko ayaadat ke liye yar ne bheja
achchha ye ilaj-e-dil-e-ranjur nikala

ai tir-e-sitam chal teri dawat hai mere ghar
zakhm-e-dil-e-nashad ne ankur nikala

wo tazkira-e-ghair pe jhunjhla ke ye bole
phir aap ne 'muztar' wahi mazkur nikala