dil liya jis ne bewafai ki
rasm hai kya ye dilrubai ki

tazkira sulah-e-ghair ka na karo
baat achchhi nahin ladai ki

tum ko andesha-e-giraftari
yan tawaqqo nahin rihai ki

wasl mein kis tarah hun shadi-e-marg
mujh ko taqat nahin judai ki

dil na dene ka hum ko dawa hai
kis ko hai laf dilrubai ki

ek din tere ghar mein aana hai
bakht o tale ne gar rasai ki

dil lagaya to nasehon ko kya
baat jo apne ji mein aai ki

'shefta' wo ki jis ne sari umr
din-dari o parsai ki

aakhir-e-kar mai-parast hua
shan hai us ki kibriyai ki