faza malul thi main ne faza se kuchh na kaha
hawa mein dhul thi main ne hawa se kuchh na kaha

yahi khayal ki barse to khud baras jae
so umr-bhar kisi kali ghata se kuchh na kaha

hazar khwab the aankhon mein lala-zaron ke
mili sadak pe to baad-e-saba se kuchh na kaha

wo raston ko sajate rahe unhon ne kabhi
gharon mein nachne wali bala se kuchh na kaha

wo lamha jaise khuda ke baghair bit gaya
use guzar ke main ne khuda se kuchh na kaha

shabon mein tujh se rahi meri guftugu kya kya
dinon mein chand tere naqsh-e-pa se kuchh na kaha