dil mein bhar kar soz ye ishq-o-wahshat ki bimari ka
jism diya hai tu ne mujh ko ek nira sansari ka

ya-rab teri izzat rakhne ko hum ab tak zinda hain
warna hum ko shauq nahin hai kori duniya-dari ka

ye bhi to ho sakta hai ek lambi nind mein hon hum tum
maut jise kahte hain shayad aalam ho bedari ka

sare apne apne man ki shakl bata kar ladte hain
tu hi bata ab kya matlab hai aisi parda-dari ka

jaise tu ne log banae logon ko insan bana
tab ja kar hum loha manenge teri fankari ka