dil mera saghar-e-shikayat hai
zahr-e-gham bas ki be-nihayat hai

wo bhawen mujh pe kyun na zulm karen
chashm-e-khun-rez ki himayat hai

dew mujhe lakh dam ki jagir
zulf kholo badi riayat hai

naqd-e-didar bul-hawas kun na dew
is mein sarkar ki kifayat hai

be-gunahon kun qatl karne par
mufti-e-naz ki riwayat hai

haikal-e-lakht-e-dil mein harf-e-wafa
murshid-e-ishq ki inayat hai

shama-ru sun bayan-e-soz-e-'siraj'
ki ajab dard ki hikayat hai