dil mutmain nahin hai nazar mutmain nahin
is daur-e-ibtila mein bashar mutmain nahin

kaif-e-bahaar bazm-e-tarab raqs-e-jam-e-mai
kis kaam ke hain dil hi agar mutmain nahin

aalam kisi ke tir-e-nazar ka shikar hai
phir bhi kisi ka tir-e-nazar mutmain nahin

kya jaane kis maqam pe ye sath chhod den
in rahbaron se ahl-e-safar mutmain nahin

sau bar aashiyana jalane ke bawajud
meri taraf se barq-o-sharar mutmain nahin

faizan-e-jalwa aur zara aam kijiye
dil ko to hai yaqin-e-nazar mutmain nahin

'maikash' ko mai-kada mein bhi gham se nahin mafar
hain baada-khwar jama magar mutmain nahin