dil ne phir chaha ujale ka samundar hona
phir amawas ko mila mera muqaddar hona

dosto main to na manunga wo hai khushk-mizaj
us ne aankhon ko sikhaya hai meri tar hona

aaj sunte hain wo mail-ba-karam aaega
ai meri ruh mere jism ke andar hona

mere honton pe jami pyas gawahi degi
main ne qatre ko sikhaya tha samundar hona

mujh se is bar miloge to samajh jaoge
kaisa hota hai kisi shakhs ka patthar hona