jo bhi teri aankh ko bha jaega
jaan-e-jaan mahbub samjha jaega

nam zulfon ka na lena bhul kar
dil ka panchhi dam mein aa jaega

waqt ke maqtal mein hum hain dosto
waqt ek din hum ko bhi kha jaega

wo samajhta hai meri haalat magar
main agar kah dun to sharma jaega

kuchh na kahna raaz-dan bas dekhna
aankh se wo muddaa pa jaega

kah rahe hain wo na 'bismil' yun tadap
tujh pe zalim dil mera aa jaega