dil par jo guzarte hain wo gham dekh rahe hain
apnon ki inayat-o-karam dekh rahe hain

nazdik hain wo jag utha apna muqaddar
ye khwab khuli aankhon se hum dekh rahe hain

shab khwab mein roya tha koi hum se lipat kar
hum subh ke daman ko bhi nam dekh rahe hain

ye aur hain din waqt gaya but-shikani ka
sajte hue patthar ke sanam dekh rahe hain

milti nahin jin ko mere mahbub ki chaukhat
auron ke nishanat-e-qadam dekh rahe hain

fan bechna padta hai 'sharar' husn-e-zarurat
bechaargi-e-ahl-e-qalam dekh rahe hain