dil par jo zakhm hain wo dikhaen kisi ko kya
apna sharik-e-dard banaen kisi ko kya

har shakhs apne apne ghamon mein hai mubtala
zindan mein apne sath rulaen kisi ko kya

bichhde hue wo yar wo chhode hue dayar
rah rah ke hum ko yaad jo aaen kisi ko kya

rone ko apne haal pe tanhai hai bahut
us anjuman mein khud pe hansaen kisi ko kya

wo baat chhed jis mein jhalakta ho sab ka gham
yaaden kisi ki tujh ko sataen kisi ko kya

soe hue hain log to honge sukun se
hum jagne ka rog lagaen kisi ko kya

'jalib' na aaega koi ahwal puchhne
den shahr-e-be-hisan mein sadaen kisi ko kya