dil tere taghaful se khabar-dar na ho jae
ye fitna kahin khwab se bedar na ho jae

muddat se yahi parda yahi parda-dari hai
ho koi to parde se numudar na ho jae

mujh se mera afsana-e-mazi na suno tum
afsana naya phir koi tayyar na ho jae

ai masti-e-ulfat sabaq-e-kufr diye ja
jab tak mujhe har chiz se inkar na ho jae

hona hai jo hasti ko meri khak hi 'simab'
pahle hi se kyun khak-e-dar-e-yar na ho jae