dil umangon se jo khali ho to be-dil kahiye
phir kise naqa samajhiye kise mahmil kahiye

ab koi yar na dildar na dushman na harif
zindagi is ko teri kaun si manzil kahiye

aaj har gam pe maqtal ka guman hota hai
kise qatil to kise kucha-e-qatil kahiye

zindagi maut se kuchh kam to nahin hai dushwar
kise aasan samjhiye kise mushkil kahiye

sari bimari o sehhat ka usi par hai madar
jism ka chhota sa tukda ki jise dil kahiye

sari qurbaniyan ab tak ki to baatil thahrin
kya bacha phir ki jise zist ka hasil kahiye

dil hi viran ho 'azhar' to kahan phir raunaq
ras aa sakti hai phir kaun si mahfil kahiye