dil zulf-e-butan mein hai giraftar hamara
is dam se hai chhutna dushwar hamara

bazar-e-jahan mein hain ajab jins-e-zabun hum
koi nahin ai wae kharidar hamara

thi dawar-e-mahshar se tawaqqo so tujhe dekh
wo bhi na hua hae taraf-dar hamara

kyunkar na dam-e-sard bharen hum ki har ek se
milta hai bahut garm kuchh ab yar hamara

tujh bin use ye samjhen ki hai shola-e-dozakh
gar ho gul-e-jannat gul-e-dastar hamara

'rasikh' ye pas-e-marg bhi hamrah rahega
hai yar ka gham yar-e-wafadar hamara