do aabnusi phul hain patthar pe kai hai
sahra ke sabz bagh mein shab aa samai hai

maujon pe dil ki shakl banane ke waste
aawaz kitni dur se wapas bulai hai

sine ka josh pi liya khwabon ke hirs ne
be-nuriyon ki aag ne ye aanch khai hai

sae ke ped rizq hue gard-baad ka
ujde hue gharon ka muqaddar hawai hai

palkon ne haft-khwan kiye wo sar ke charkh par
kali shabon mein sat kamani ban aai hai