dost ka ghar aur dushman ka pata malum hai
zindagi hum ko tera ye silsila malum hai

zindagi ja hum bhi ku-e-arzu tak aa gae
is ke aage hum ko sara rasta malum hai

kya munajjim se karen hum apne mustaqbil ki baat
haal ke bare mein hum ko kaun sa malum hai

ya to jo na-fahm hain wo bolte hain in dinon
ya jinhen khamosh rahne ki saza malum hai

sher par to aap ki qudarat musallam hai 'shuja'
is zamane ka bhi kuchh achchha bura malum hai