dosti kar na dushmani ke liye
aadamiyyat hai aadmi ke liye

ye musawat kaisi gulshan mein
log tarsen kali kali ke liye

ghafilo jaante ho ramz-e-hayat
maut aati hai zindagi ke liye

mast aankhon se dekh ai saqi
kuchh to thodi si be-khudi ke liye

rang-e-mahfil badal na jae kahin
jalwe hote nahin sabhi ke liye

apni aankhon se kuchh ata kar do
asar-e-sehr-e-samri ke liye

azmat-e-admi na puchh 'ahsan'
kabe jhukte hain bandagi ke liye