dub kar par utar gae hain hum
log samjhe ki mar gae hain hum

ai gham-e-dahr tera kya hoga
ye agar sach hai mar gae hain hum

khair-maqdam kiya hawadis ne
zindagi mein jidhar gae hain hum

ya bigad kar ujad gae hain log
ya bigad kar sanwar gae hain hum

maut ko munh dikhaen kya ya rab
zindagi hi mein mar gae hain hum

hae kya shai hai nashsha-e-mai bhi
farsh se arsh par gae hain hum

aarzuon ki aag mein jal kar
aur bhi kuchh nikhar gae hain hum

jab bhi hum ko kiya gaya mahbus
misl-e-nikhat bikhar gae hain hum

shadmani ke rang-mahlon mein
'shad' ba-chashm-e-tar gae hain hum