pahle to neze khwab mein boya karenge raat din
aankhon se apni khun phir dhoya karenge raat din

hum titliyon ke pankh pe dhaaren laga ke nind ki
ek shahr-e-nau ke khwab mein chhoda karenge raat din

bedar rah kar bhi hamein khwari mili so tai kiya
maut aa na jae jab talak soya karenge raat din

tum ek jawab-e-mukhtasar ka hum se jo wada karo
hum ek sawal-e-wasl hi socha karenge raat din