duniya kahin jo banti hai mitti zarur hai
parde ke pichhe koi na koi zarur hai

jate hain log ja ke phir aate nahin kabhi
diwar ke udhar koi basti zarur hai

mumkin nahin ki dard-e-mohabbat ayan na ho
khilti hai jab kali to mahakti zarur hai

ye jaante hue ki pighalna hai raat bhar
ye shama ka jigar hai ki jalti zarur hai

nagin hi jaaniye use duniya hai jis ka nam
lakh aastin mein paliye dasti zarur hai

jaan de ke bhi kharido to duniya na aae hath
ye musht-e-khak kahne ko sasti zarur hai