dur dil se mere wahshat nahin ki ja sakti
ab to tujh se bhi mohabbat nahin ki ja sakti

zulm itne kiye us ne ki wo ab qadmon mein
sar bhi rakh de to murawwat nahin ki ja sakti

pas rahna hi taqaza-e-mohabbat to nahin
itni si baat pe nafrat nahin ki ja sakti

justuju mein teri main jaan-ba-kaf phirta hun
ishq mein khud se mohabbat nahin ki ja sakti

sari hairat ki haden tod ke rakh din us ne
ab kisi baat pe hairat nahin ki ja sakti