dur tak rah gai hai tanhai
khud-parasti ki ye saza pai

ab to didar bhi mayassar kar
jab ata ki hai mujh ko binai

kya tera koi bhi nahin hai yahan
tanz karti hai roz tanhai

dusra ishq karke dekh liya
ho na pai tumhaari bharpai

kaun meri gali mein aaya hai
kis ne sari faza hai mahkai

masale baat kar ke hal hote
aap khamosh ho gae bhai

jab bhi khalwat mein sochta hun tujhe
raqs karti hai meri tanhai

jis ki khatir ujad gaya 'shiraaz'
ab talak dil mein hai wo harjai