dushman se ittihad ke chakkar mein pad gaya
har dost ab mafad ke chakkar mein pad gaya

thodi jagah mili jo kisi kakh-e-husn mein
dil sari jaidad ke chakkar mein pad gaya

karta raha gurez jo ek umr wasl se
ab lams ke swad ke chakkar mein pad gaya

ek husn-e-shandar pe kaamil ghazal ke baad
shair nae mawad ke chakkar mein pad gaya

yaksaniyat chhalakne lagi us ke sher se
jo shakhs infirad ke chakkar mein pad gaya

patti tassubaat ki bandhi jo ghair ne
apnon se hi jihad ke chakkar mein pad gaya

achchhe sukhan ka lutf nahin le saka 'qamar'
naqqad jab inad ke chakkar mein pad gaya