dushmani chalti rahi yaron ke bich
phul bhi khilte rahe kharon ke bich

ho agar iman-e-kaamil aaj bhi
raqs ho sakta hai angaron ke bich

dosti ki chhat banana chahiye
hum ko bhi rahna hai diwaron ke bich

aap ko to chand kahte the sabhi
aap kyon dhundla gae taron ke bich

khud-farebi ne sahaara de diya
mil gaya iqrar inkaron ke bich

khub hai 'muztar' ka rang-e-shairi
khun ki surkhi hai ghazal-paron ke bich