dusron mein nikale hai wo khamiyan
dekh lo kis qadar us mein hain khubiyan

hum ne jin ke sabhi gham khushi se liye
dekhte hi rahe wo to sud-o-ziyan

khub se khub-tar aap hone lage
mand padne lagin sari ranaiyan

aarzi pyar apnon se bhi kyon agar
ghair se aap ko ishq hai jawedan

rahbar se gila be-sabab be-asar
jab muqaddar mein thin apne gumrahiyan

chain se ji raha hoga wo bhi kahan
jis ne 'tahir' ko din itni be-chainiyan