jo dil-nawaz ho apna wo dilruba na mila
sitam-pasand mila dard-ashna na mila

gharib dub gaya bahr-e-gham ke tufan mein
wo jis ko dab ke ubharne ka hausla na mila

jhuka sake na mere dil ko ahl-e-dair-o-haram
khuda ke ghar mein khuda ki qasam khuda na mila

wo ek tum ho ki sahil mila baghair talab
wo ek main hun ki tinke ka aasra na mila

khuda ka shukr hai 'mohsin' ki mil gai manzil
bhala hua ki hamein koi rahnuma na mila