ehsas-e-ishq dil ki panahon mein aa gaya
baadal simat ke chand ki bahon mein aa gaya

izhaar-e-ishq main ne kisi se nahin kiya
aur be-sabab jahan ki nigahon mein aa gaya

wo muskura ke dekh rahe hain meri taraf
itna asar to ab meri aahon mein aa gaya

kya puchhte ho azm-e-safar ki karamaten
manzil ka naqsh khud meri rahon mein aa gaya

hain ibtidai marhale ye ishq ke abhi
'sahil' ye soz kyun teri aahon mein aa gaya