ek 'alam hai jahan be-sar-o-samani hai
kaun aaega yahan be-sar-o-samani hai

ek kalise se dhuan be-sar-o-samani hai
ek masjid se azan be-sar-o-samani hai

ek dariya hai azal ta-ba-abad bichon-bich
bhid hai ta-ba-karan be-sar-o-samani hai

ek amboh hai manzil ke liye sargardan
shahr hai dasht-e-guman be-sar-o-samani hai

ek parkar se kuchh daere hain khinche hue
aur chalta hai jahan be-sar-o-samani hai

main kisi dal pe baitha hua tanha panchhi
us ke hathon mein kaman be-sar-o-samani hai