ek alaw jalta tha
qissa aankhen malta tha

ek aaseb sa tha koi
jis ka sikka chalta tha

us ke raushan chehre se
kala jadu talta tha

dil ki kunj kahani mein
sanp sunahri palta tha

chhalni the sab mashkize
khema khema jalta tha

gunj kahin roti thi aur
raat ka dera dhalta tha

nindon ki dhalwanon se
ek hi khwab phisalta tha

surkh sikudte honton par
koi harf pighalta tha

sare shahr mein dar 'tanwir'
panw panw chalta tha