ek be-wafa se pyar kiya hae kya kiya
dushman pe eatibar kiya hae kya kiya

dil ne ba-fart-e-josh-e-junun un ke samne
har raaz aashkar kiya hae kya kiya

aaraishon se kaam raha jin ko umr bhar
aison ka intizar kiya hae kya kiya

izhaar-e-dard hijr na tha hum ko kuchh zarur
us but ko sharmsar kiya hae kya kiya

mere junun-e-shauq ke charche hain har kahin
daman bhi tar tar kiya hae kya kiya

ab dil hai rasm-o-rah-e-mohabbat se munharif
fikr-e-maal-e-kar kiya hae kya kiya

tasir-e-iztirab se aakhir wo kah uthe
'premi' ko be-qarar kiya hae kya kiya