ek dasht mein ek karwan rukta raha chalta raha
khauf-o-khatar ke darmiyan rukta raha chalta raha

phulon har us us jagah aa kar basain bastiyan
in raston par tu jahan rukta raha chalta raha

pahle the virane jahan ab hain wahan aabaadiyan
yani hujum-e-be-karan rukta raha chalta raha

chalte hue rukte hue dekha to main hairan hua
hamrah mere aasman rukta raha chalta raha

jaane kahan ke log the aur ja rahe the wo kahan
har shakhs pahne bediyan rukta raha chalta raha

mere guzishta ke nishan mujh ko na aa pae nazar
ai zindagi main kab kahan rukta raha chalta raha

go qafile ki har sawari 'qais' thak ke mar gai
be-dam akela sarban rukta raha chalta raha