ek diwar si kohre ki khadi hai har su
par samete hue baithi hai chaman mein khushbu

ye andhere bhi hamare liye aaina hain
ru-ba-ru karte hain kirdar ke kitne pahlu

in sulagte hue lamhon se ye milta hai suragh
dam-ba-dam tut raha hai shab-e-gham ka jadu

dam-bardar koi dasht-e-wafa se guzra
surat-e-khwab hua husn-e-khiram-e-ahu

phir hua habs ka ehsas-e-giran-bar 'suhail'
phir mera dil hai talab-gar-e-hawa-e-gesu