ek gahri chup andar andar ruh mein utri jae la-fani ho jaun ye khwahish pal pal badhti jae ye patthar si tanhai ye bhaari bojhal raat jaane kaisa bojh hai dil par nas nas tuti jae ek naya an-dekha manzar mujh se kare kalam ek nai an-jaani khushbu mujh se lipti jae us ka sath ek uljhi dor hai bhagte lamhon ki jitna suljhaun main us ko utna ulajhti jae sare naqsh tamannaon ke raushan hote jaen khidki mein us ki parchhain gahri hoti jae 'ramz' adhure khwabon ki ye ghatti badhti chhanw tum se dekhi jae to dekho mujh se na dekhi jae