ek gul-e-tar bhi sharar se nikla
bas-ki har kaam hunar se nikla

main tere baad phir ai gum-shudagi
khema-e-gard-e-safar se nikla

gham nikalta na kabhi sine se
ek mohabbat ki nazar se nikla

ai saf-e-abr-e-rawan tere baad
ek ghana saya shajar se nikla

raste mein koi diwar bhi thi
wo isi dar se na ghar se nikla

zikr phir apna wahan muddat baad
kisi unwan-e-digar se nikla

hum ki the nashsha-e-mahrumi mein
ye naya dard kidhar se nikla

ek thokar pe safar khatm hua
ek sauda tha ki sar se nikla

ek ek qissa-e-be-mani ka
silsila teri nazar se nikla

lamhe aadab-e-tasalsul se chhute
main ki imkan-e-sahar se nikla

sar-e-manzil hi khula ai 'bani'
kaun kis rahguzar se nikla