ek haqiqat hun agar izhaar ho jaunga main
jaane kis kis jurm ka iqrar ho jaunga main

kat lo ab ke mujhe bhi khwahishon ki fasl par
zindagi ek khwab hai bedar ho jaunga main

rafta rafta bagh ki sab titliyan kho jaengi
aur ek din khud se bhi bezar ho jaunga main

ya to ek din tod dalunga hisar-e-agahi
ya kisi qisse ka ek kirdar ho jaunga main

aks-andar-aks aata hai nazar mujh ko 'kamal'
kya kisi din aaine ke par ho jaunga main