ek hasin paikar-e-taslim-o-raza ho jaise
ek tum dushman-e-arbab-e-wafa ho jaise

yun mujhe un ki inayat ka khayal aata hai
ek afsana kabhi main ne padha ho jaise

zindagi itni giran-bar nazar aati hai
ek mujrim ke liye koi saza ho jaise

dil ke goshe mein tamannaon ki fariyaaden hain
ya kahin raat gae shor utha ho jaise

aise be-gana-e-haalat wo rahte hain 'rafia'
kuchh kiya ho na kaha ho na suna ho jaise