ek jurm-e-mohabbat ki kya aur saza hogi
tanhai ke gham honge marne ki dua hogi

jab husn ke hathon se takmil-e-wafa hogi
wo subh bhi kya hogi wo sham bhi kya hogi

jae to kahan jae ab chhod ke ruswai
is ki bhi guzar kaise ab mere siwa hogi

ek jashn-e-masarrat mein kuchh dubti aawazen
tute hue shishon ki pur-dard sada hogi

har aks giraftar-e-aina hai ai 'afsar'
parchhain bhi insan ki aaina-numa hogi