ek khalish si hai mujhe taqdir se
al-aman us khar-e-daman-gir se

hasrat-e-nazzara ki tasir se
parda uttha yar ki taswir se

sham-e-gham ke rone wale sabr kar
subh bhi hogi teri taqdir se

iddaa-e-zabt-e-gham karna pada
tang aa kar aah-e-be-tasir se

mujh ko diwana samajh len ahl-e-hosh
kyun ulajhte hain meri zanjir se

dil nahin ek aabla sine mein hai
is nigah-e-garm ki tasir se

hoti hai taskin 'farhat' kuchh na kuchh
khush hun apni aah-e-be-tasir se