ek khudi be-khudi ke andar hai
raaz khud raaz hi ke andar hai

ek qayamat koi qayamat si
zer-e-lab khamushi ke andar hai

ek ek qatra girya-e-shabnam
phul jaisi hansi ke andar hai

hans pade hum to ro padin aankhen
gham bhi shayad khushi ke andar hai

din dhalega to raat aaegi
tirgi raushni ke andar hai

husn-araiyan baja lekin
dilkashi sadgi ke andar hai

nara-e-inqalab ai 'anwar'
aaj bhi shairi ke andar hai