apne badan ki aag mein jalna pada mujhe
phir ye hua ki rakh mein dhalna pada mujhe

aasan itni hoti nahin rah ishq ki
phulon ke sath kanton pe chalna pada mujhe

suraj ghamon ka sar pe raha hai tamam umr
aur qatre qatre roz pighalna pada mujhe

main jaanta tha dukh bahut hoga mujhe magar
us ki gali se ho ke nikalna pada mujhe

kab tak main chhupta rahta bhala tirgi se 'qalb'
phir misl-e-aftab nikalna pada mujhe